24 January, 2014

ရဟန်းနှင့် ရတီ


ရဟန်းနှင့် ရတီ
========

“ငါ့ရှင်အာနန္ဒာ သင်သည် မာတုဂါမတို့ကို မြတ်စွာဘုရား၏ ကိုယ်တော်ကို ရှေးဦးစွာ ရှိခိုးစေ၏။ ငိုသော ထိုမာတုဂါမတို့၏ မျက်ရည်သည် မြတ်စွာ ဘုရား၏ ကိုယ်တော်ကို လိမ်းကျံ၏။ ဤသည်လည်း သင်၏ မကောင်းသော အပြုအမူတည်း။ ထိုမကောင်းသော အပြုအမူကို ဒေသနာကြားလော့..။”
--------------------
(စူဠ၀ဂ္ဂပါဠိတော်)
--------------------
(၁)

နိုင်ငံရပ်ခြား တိုင်းတစ်ပါးဟူသော ပင်လယ်တွင် နှစ်အတန်ကြာ ရွက်လွှင့်နေမိရာမှ ရွေှ့ပြည်ကြီး၏ မုဒိတာဆိပ်ကမ်းများဆီ ပြန်လည်ဆိုက်ကပ်ချိန် ခေတ်မီပရိယတ္တိ ပညာရေးစီမံကိန်းနှင့် ဓမ္မအသိဖြန့်ဝေရေးလုပ်ငန်းစဉ်များအတွက် ဓမ္မဂင်္ဂါဗုဒ္ဓဘာသာ ပါဠိကောလိပ်ပရောဂျက်ကို အစပျိုးခဲ့လေသည်။

အမှန်တကယ်တော့ သူက ပညာရေးစဦးတည်ထွင်သူ၊ ကောလိပ်ပရောဂျက်ဖော်ဆောင်သူစသော ဂုဏ်ပုဒ်များထက် အသင့်ရှိပြီးစာသင်ခန်းများတွင်သာ အေးအေးလူလူ ဖြတ်သန်းချင်ခဲ့မိသည်။
သို့သော် အသင့်ရှိနေပြီးသော စာသင်ခန်းအဟောင်းများက ပညာရေးအိုင်ဒီယိုလော်ဂျီအသစ်တစ်ခုကို မိတ်ဆက်ပေးရန် အသင့်ဖြစ်မနေခဲ့ကြပြန်ပါ..။ သို့နှင့် စိတ်မပါလှသော ဆောက်လုပ်ရေးလုပ်ငန်းခွင်ထဲ သင်္ကန်းတစ်လွှားလွှားဖြင့် ဖြတ်သွားကူးသန်း စိတ်အလန်းဇယားမကျနိုင်အောင် ဖြစ်နေခဲ့ရသည်။

မိတ်ဆွေဆရာဝန်တစ်ယောက်ကတော့ “အရှင်ဘုရားအနေနဲ့ ပညာရေးအ၀န်းအ၀ိုင်းထဲမှာ ပူပူနွေးနွေးထမ်းပိုးလာတဲ့ အတွေးတွေကို ချပြရမှာဘုရား..ခုတော့ အုတ်သဲကျောက်တွေထဲမှာ အရှင်ဘုရားရဲ့ အတွေးတွေ မှိုတက်ရေစိုကုန်တော့မှာပဲ ”တဲ့..။

စာသင်ခန်းပျောက်နေသော ပရိယတ္တိဝန်ဆောင်ရဟန်းတစ်ပါး၏ နေ့ရက်များကို ကုစားရန် ကမ္ဘာအေးဘုရားလမ်းပေါ်က ကျောင်းထိုင်လောင်းလျာလေးများအတွက် ဖွင့်လှစ်ထားသော သင်တန်းကျောင်းတံခါးထဲ စွပ်ဝင်သွားခဲ့သည်။ သင်တန်းသားရဟန်းတော်များအား ဒုတိယဘာသာစကားတစ်ခုသင်ကြားပေးရန် ကမ်းလှမ်းခြင်းခံခဲ့ရသည်။

ကိုယ့်လမ်းစရိတ်ကိုယ်စိုက်ထုတ်ကာ ပညာရေးကို ဒါနပြုခွင့်ရသော အနစ်နာခံခြင်းမျိုးဖြင့် ဆရာတစ်ပါးဖြစ်ရခြင်း ပီတိကို ပျော်ရွှင်စွာ စားသုံးနိုင်ခဲ့သည်။ လက်ခံရရှိသော ပညာပူဇော်ကြေးက စာသင်ချိန်ဆယ်ရက်ထက်မကပိုသော သူ့အတွက် အငှားယဉ်စီးခနှစ်ရက်စာမျှကိုပင် မကာမိ..။
သို့သော် သူ့စာသင်ချိန်များကို မျှော်နေပါသည် ဟူသော သာဝကများ၏ စကားဖြင့်ပင်
အပျော်လှိုင်းမိနေတော့သည်။

အရှိန်ပြင်းလှသော နည်းပညာယုဂခေတ်နှင့် ရာစုသစ်ကြီးကို တွန်းတွန်းတိုက်တိုက် မျက်နှာချင်းဆိုင်နေ ရသော ရဟန်းတစ်ပါးအနေဖြင့် သမာဓိကျဲပါးလှသော နေ့ရက်တို့ကို ကျော်လွှားရန် စာအုပ်များ၊ သို့မဟုတ် အွန်လိုင်းစာမျက်နှာများပေါ်တွင် စိတ်ကို သတိကျောပိုးအိတ်ဖြင့် ကျောင်းတက်စေခဲ့သည်။

၂၀၁၃ သြဂုတ်လမှစ၍ ရတီမဂ္ဂဇင်း၏ စာမျက်နှာ (၁၇ )တွင် သူ့အတွေးများ ၀ါဆိုခွင့်ရသွားခဲ့ခြင်းကလည်း အမှတ်တရဖြစ်ထိုက်၏။ ရတီသည် သူ့အတွေးများ၏ ၀ါဆိုကျောင်းတစ်ခုဖြစ်လာခဲ့ပါသည်။

(၂)

ရတီဟူသော ဝေါဟာရနှင့်ပတ်သက်၍ သူသိထားနှင့်သော အဓိပ္ပါယ်အမျိုးမျိုးထဲမှ မည်သည့်ဖွင့်ဆိုချက်ပါလိမ့် ဟု အယ်ဒီတာဒကာမလေးကို မေးမိသည်။
စိန်ကို တန်ဖိုးချင့်တွက်သော စံယူနစ်အဖြစ် ဖွင့်ဆိုလိုပါသတဲ့...။
ခရီးအကွာအဝေးကို မိုင်ယူဇနာဖြင့် တွက်ရသလို စိန်တန်ဖိုးကိုလည်း ရတီဖြင့် ဖြတ်ရြုခင်းမျိုးဖြစ်ပေမည်။ သို့သော် သူက ဗဟိဒ္ဓရတနာများနှင့် အလှမ်းဝေးလှသဖြင့် အတွေးအမြင်မရှင်းလှ..။ စိန်ကဲထက် စိတ်အကဲသိဖို့သာ သင်ယူခဲ့သည်မဟုတ်လား..။

လောကီကျမ်းဂန်၊အဘိဓာန်နှင့် ပိဋကတ်အဆူဆူမှာတော့ ရတီက မွေ့လျော်ပျော်ပိုက်ခြင်းအဓိပ္ပါယ်ရှိသည့် ရတိဟူသော စကားလုံးကို အခြေခံသည်။ ရတိနှင့်ပတ်သက်သော ဖွင့်ဆိုချက်စာမျက်နှာများကို တမေ့တမောဖတ်ရ၏။ ဓမ္မအရေးတွင် သမထ၀ိပဿနာနှင့် ယှဉ်သောပီတိသုခ၊ ဈာန်သမာပတ်ချမ်းသာတွင် မွေ့လျော်ခြင်းနှင့် ရဟန်းတစ်ပါး၏ သာသနာတော်၌ ပျော်ပိုက်မှုစိတ်အပျော့ထည် စသောအဓိပ္ပါယ်များကို ကောက်ယူနိုင်သည်။

လောကအရေးမှာတော့ ရတိက လွတ်လပ်ကျယ်ပျောသည်။ ၁)ဒက္ခပဇာပတိနတ်မင်းကြီး၏ သမီးတော်၊ ကာမဒေ၀နတ်မင်း၏ ကြင်ယာ ရတိမည်သော နတ်သမီး၊ ၂)စွဲလမ်းတပ်မက်မှုအချစ်၊ ၃)ကာမဂုဏ်ခံစားခြင်း၊ ၄) အလှတရား ၅) လျှို့ဝှက်ခြင်း ၆) နှစ်သက်ရွှင်လန်းခြင်းနှင့် ၇)ရတိဌာယီဘာဝအလင်္ကာစသော အနက်များစွာကို ပေးသည်။ ထိုရတိ(ပျော်မွေ့ခြင်း) ရှိသော သူကို ရတီ ဟု ဆိုသည်။

သို့ဆိုလျင် ရတီမဂ္ဂဇင်းသည် ပျော်ရွှင်မှု၊ အလှတရား၊ ချစ်ခြင်းမေတ္တာနှင့် လျှို့ဝှက်ချက်များစွာ ရှိသော ဖက်ရှင်နတ်သမီးတို့၏ စံပျော်ရာ ဖြစ်လိမ့်မည်..။ စာဖတ်ပရိသတ်အဖြစ် အမျိုးသမီးထုကို စွဲဆောင်ထားနိုင်သည်။

ရဟန်းတစ်ပါးနှင့် ဖက်ရှင်လောကသည် အလှမ်းဝေးသယောင်ရှိသော်လည်း ဗုဒ္ဓ၏ သမီးပျို ဖက်ရှင်မျိုးဆက်၏ အဇ္ဈတ္တတွင် ဆင်မြန်းရန် တရားဓမ္မ၏ အလှကို
ပုံစံအသစ်ဖြင့် မိတ်ဆက်ပေးဖြစ်ခဲ့ပါသည်။

သို့နှင့် ရဟန်းနှင့် အော်စလို၊ ရဟန်းနှင့် ပင်လယ်၊ ရဟန်းနှင့် အပြုံးတောအုပ်..။
ရဟန်းနှင့် ဗယ်လင်တိုင်ဝဋ်......။ ယခု ရဟန်းနှင့် ရတီ...။

(၃)

သူကိုယ်တိုင်ရေးသော ဓမ္မအတွေးဆောင်းပါးအချို့က ရတီ၏ ခေတ်မီမီ ကမ္ဘာကြည့်ကြည့်နိုင်သော မြန်မာ့အလှ၊ မြန်မာဣနြေ္ဒစာမျက်နှာများ၊ အခြားသုတရသစာ၊ ကဗျာများကြားတွင် သရုပ်ဖော်ပုံလေးများနှင့် သစ်လွင်ဝေဆာနေသည်။ ကျေးလက်က မိခင်ကြီးထံ လစဉ်ပုံမှန် ပို့ပေးဖြစ်သည်။ မျက်စိမှုံသော အမေက သားရဟန်း၏ စာကို ဖက်ရှင် ရုပ်ပုံများကြိုက်နှစ်
သက်သော မြေးမလေးများကို ဖတ်စေသည်။
တရားစာအုပ်ကြီးသက်သက်ဆိုလျင် သူ့တူမလေးများက ယောင်လို့တောင် မကိုင်..။ ခုတော့ ဖက်ရှင်မဂ္ဂဇင်းစာမျက်နှာပေါ်က ဓမ္မအတွေးများ...။
ဖက်ရှင်ကို စိတ်မ၀င်တော့သောအမေနှင့် တရားနံ့မခံနိုင်သော မြေးမလေးများ ပေါင်းစည်းသွားသည်။
အမှန်တကယ်တော့ သူက ပေးချင်သည့် ဓမ္မမက်ဆေ့ခ်ျကို ချောကလက်လုပ်ကာ ကျွေးလိုက်ခြင်းဖြစ်သည်။

မြန်မာ့အမျိုးကောင်းသမီးလေးတို့၏ ဗဟိဒ္ဓအသွင်အပြင်၊ ရှုတိုင်းယဉ်ကြစေသလို အဇ္ဈတ္တအလှတရားအဆင့်မြင့်မားဖို့လည်း ဓမ္မပညာရေးလိုအပ်နေတာပဲ မဟုတ်လား...။

(၄)

ဗုဒ္ဓအရှင်၏ တရားဘဏ္ဍာတော်ထိန်းဖြစ်သူ ရှင်အာနန္ဒာကိုယ်တော်ကြီးသည်လည်း အမျိုးသမီးတို့၏ ဓမ္မပညာရေးနှင့် လောကုတ္တရာအခွင့်အရေးအတွက် အလေးထားရွက်ဆောင်တော်မူခဲ့သည်။
ကောသလတိုင်း၊ သာဝတ္ထိမြို့တော်က ဘုရင့်ရွှေနန်းဆောင်ကို ကြွရောက်ကာ မိဖုရားနှင့် မောင်းမမိဿံများအတွက် ပရိုက်ဗိတ်ဆရာတစ်ဆူအဖြစ် ဓမ္မပညာကို ပို့ချပေးတော်မူခဲ့ရသည်။ မိဖုရားများက တရားဓမ္မပို့ချပေးနိုင်သည့် ရဟန်းတစ်ပါးစေလွှတ်ဖို့ ဘုရားရှင်ကို လျှောက်ထားပေးရန် ကောသလဘုရင်ကြီးကို ပူဆာကြသည် တဲ့..။ 
မည်သည့်ရဟန်းအား ပင့်လျှောက်ရမည်ကို မယ်မင်းတို့ကိုယ်တိုင် ဆုံးဖြတ်ကြပါဘိ ဟု ဘုရင်ကြီးက ဆိုလေသော် မိဖုရားများက
ရှင်အာနန္ဒာ ဟု သံပြိုင် ဆိုမိကြသည်အထ်ိ ရှင်အာနန္ဒာက ပေါ်ပြူလာဖြစ်နေသည်။  ထိုအချိန်မှစကာ အမျိုးသမီးများအတွက် ဓမ္မပညာရေးလမ်းပွင့်သွားသည်။  ကောသမ္ဗီနန်းတွင်းမှာလည်း ဥတေနမင်း၏ မိဖုရားများ၏ ပရိုက်ဗိတ်ဓမ္မကထိကအဖြစ် ပင့်ဖိတ်ခြင်းခံတော်မူခဲ့ရသည်။

ရှင်အာန္ဒာက ဗုဒ္ဓခေတ်မဇ္ဈိမဒေသ ဣတ္ထိယကမ္ဘာတွင် ကျော်ကြားထင်ရှားသည်။
အမျိုးသမီးများ၏ ကိုးစားမှုကို ရရှိခဲ့သည်။
အမျိုးသားများနှင့် တန်းတူ သာသနာ့ဘောင်တွင် ရဟန်းပြုခွင့်ရရှိရန် ရှေ့တန်းမှ ဗုဒ္ဓအရှင်အား အရေးဆိုခဲ့၏။ သို့နှင့် မိထွေးတော် မဟာပဇာပတိဂေါတမီအစပြုသော ဘိက္ခုနီသံဃာ့အဖွဲ့အစည်းကြီးပေါ်လာသည်။

ဗုဒ္ဓအရှင် ပရိနိဗ္ဗာန်စံဝင်တော်မူလုဆဲဆဲ ကာလမှာပင် အမျိုးသမီးများနှင့် ရဟန်းတော်များဆက်ဆံရေးအတွက် တခုတ်တရမေးမြန်းခဲ့သည်။
အရှင်ဘုရား အမျိုးသမီးများအပေါ် မည်သို့ ပြုမူဆက်ဆံရပါမည်နည်း ဘုရား..။
မတွေ့နဲ့ အာနန္ဒာ..။
မဖြစ်မနေ တွေ့ရမယ်ဆိုရင်ဘုရာ့...။
စကားမပြောနဲ့ အာနန္ဒာ..။
မဖြစ်မနေပြောရမယ်ဆိုရင် ဘုရာ့..။
အမိရင်း၊ အမနှမရင်းများလို အမှတ်သတိထားဆက်ဆံပါလေ အာနန္ဒာ...။

အမျိုးအခွင့်အရေးကို ဆောင်ရွက်သဖြင့် မြတ်စွာဘုရားပရိနိဗ္ဗာန်စံဝင်ပြီးနောက် ကျင်းပသော သံဃညီလာခံတွင် မထေရ်ကြီးအချို့၏ ကဲ့ရဲ့မှုကို ခံယူခဲ့ရသေး၏။

“ငါ့ရှင်အာနန္ဒာ သင်သည် မာတုဂါမတို့ကို မြတ်စွာဘုရား၏ ကိုယ်တော်ကို ရှေးဦးစွာ ရှိခိုးစေ၏။ ငိုသော ထိုမာတုဂါမတို့၏ မျက်ရည်သည် မြတ်စွာ ဘုရား၏ ကိုယ်တော်ကို လိမ်းကျံ၏။ ဤသည်လည်း သင်၏ မကောင်းသော အပြုအမူတည်း။ ထိုမကောင်းသော အပြုအမူကို ဒေသနာကြားလော့..။”

မြတ်စွာဘုရား၏ နောက်ဆုံးအချိန်တွင် အမျိုးသမီးထုအား ပထမဆုံးဖူးမြင်ခွင့် ပေးခြင်းကြောင့် ပစ်တင်ကြခြင်းဖြစ်သည်။ ရှင်အာနန္ဒာက အမျိုးသမီးများအား ဦးစားပေးကျင့်သုံးမှုအတွက် အပြစ်ရှိသည် ဟု မခံယူခဲ့ပါ။ သိုးဆောင်းလူမျိုးတို့၏ အမျိုးသမီးပထမ (Lady First)ကျင့်ဝတ်ကို ရှင်အာနန္ဒာက နှစ်ဆယ့်ငါးရာစုအလွန်က ကျင့်သုံးနှင့်ပြီးဖြစ်နေသည်။

ရှင်အာနန္ဒာက ဤသို့ လျှောက်ထား၏။
“အရှင်ဘုရားတို့ အကျွန်ုပ်သည် ဤမာတုဂါမတို့အား အချိန်မဲ့၌ သွားခြင်းသည် မဖြစ်ပါစေကုန်လင့် ဟု အောက်မေ့လျက် မာတုဂါမတို့အား မြတ်စွာဘုရား၏ ကိုယ်တော်ကို ရှေးဦးစွာ ရှိခိုးစေပါ၏။ အကျွန်ုပ်သည် ထိုအမှုကို မကောင်းသောအပြုအမူဟု မမြင်ပါ။ သို့သော်လည်း အရှင်တို့အား ယုံကြည်သဖြင့် ထိုမကောင်းသော အပြုအမူဟူသည်ကို ဒေသနာကြားပါ၏” တဲ့..။

တပည့်တော်ကတော့ အမျိုးသမီးတွေ အချိန်အခါလင့်သွားတာမျိုး ဖြစ်မှာစိုးလို့ ပထမဆုံးခွင့်ပေးလိုက်တာပါ၊ မကောင်းတဲ့ အပြုအမူလို့တော့ မမြင်ပါဘူး၊ ဒါပေမယ့် အရှင်ဘုရားတို့ကို လေးစားလို့ မကောင်းတဲ့ အပြုအမူဆိုတာကြီးကို ဒေသနာကြားပါတယ် ...တဲ့..။ ..။

သာသနာတော်တွင်းသို့ အမျိုးသမီးများရဟန်းပြုခွင့်ရခြင်းအတွက်လည်း ရှင်အာနန္ဒာက မထေရ်ကြီးတို့၏ ပြစ်တင်မှုကို ကြံ့ကြံ့ခံတော်မူခဲ့သည်။ မိန်းမမြတ်တို့၏ သံသရာအခွင့်အလမ်းနှင့် လောကုတ္တရာဆုဆွတ်ခူးနိုင်ခွင့်ဆောင်ရွက်ခဲ့မှုအတွက် နောင်တတဖန် စိတ်ပူပန်မှုဖြစ်တော်မမူခဲ့..။

“ငါ့ရှင်အာနန္ဒာ သင်သည် မြတ်စွာဘုရားဟောတော်မူသော သာသနာတော် ဓမ္မ၀ိနယ၌ မာတုဂါမ၏ ရှင်ရဟန်းအဖြစ်ကို လုံ့လပြု၏။ ဤသည်လည်း သင်၏ မကောင်းသော အပြုအမူတည်း..။ ထိုမကောင်းသော အပြုအမူကို ဒေသနာကြားလော့..။”

“အရှင်ဘုရားတို့ ဤမဟာပဇာပတိဂေါတမီသည် မြတ်စွာဘုရား၏ မိထွေးတော်တည်း။ ကြီးပွားအောင် ပြုစုသူတည်း၊ မွေးမြူသူတည်း၊ နို့ရည်ပေးသောသူတည်း၊ မယ်တော်နတ်ရွာစံပြီးသော် မြတ်စွာဘုရားကို နို့တိုက်ခဲ့၏ ဟု အောက်မေ့လျက်အကျွန်ုပ်သည် မြတ်စွာဘုရားဟောတော်မူသော သာသနာတော်ဓမ္မ၀ိနယ၌ မာတုဂါမ၏ ရှင်ရဟန်းအဖြစ်ကို လုံ့လပြုမိပါ၏။ အကျွန်ုပ်သည် ထိုအမှုကို မကောင်းသောအပြုအမူဟု မမြင်ပါ..။ သို့သော်လည်း အရှင်တို့အား ယုံကြည်သဖြင့် ထိုမကောင်းသောအပြုအမူဟူသည်ကို ဒေသနာကြားပါ၏။”

သို့ဆိုလျင်သာမန်ရဟန်းတစ်ပါးမျှသာဖြစ်သော သူသည်လည်း ရတီမဂ္ဂဇင်း၏ ပြတင်းတံခါးကိုဖွင့်ကာ ရှင်အာနန္ဒာလျှောက်ခဲ့သော မုဒိတာလမ်းဖုံဖုံတွင် မှုံနေအောင် လျှောက်နေပါဦးမည်..။


ဓမ္မဂင်္ဂါ
(၂၅-၁-၂၀၁၄)
=============================
ရတီမဂ္ဂဇင်း မတ်လအတွက် ရေးသားပြီးစီး၏။
ပုဒိအာနှင့် ပြည့်စုံရပါလို၏။

No comments: